Filmi dokumentar “Shtatë ditët dhe shtatë qiejt e namazit”
U shfaq filmi dokumentar “Shtatë ditët dhe shtatë qiejt e namazit”
Më 15.10.2010, në kinemanë ‘’ABC’’ në Prishtinë, u shfaq filmi dokumentar i Fatmir Mujes “ Shtatë ditët dhe shtatë qiejt e namazit’’, realizimi i të cilit ishte mbështetur nga Bashkësia Islame e Kosovës.
Shfaqjes së filmit i parapriu fjalimi i myftiut Naim Tërnava, në të cilin shquajtën: shprehja e shpresës që edhe vendi ynë të përfshihet seriozisht në proceset integruese për në Evropë; thirrja që integrimin ta arrijmë pa humbur përbërësit themelorë të identitetit tonë duke shfaqur bindjen se diveristetin fetar Evropa e quan begatim, dhe zotimi se, megjithë vështirësitë financiare që ka, Bashkësia Islame e Kosovës do të përkrahë projekte të tilla si filmi i Fatmir Mujes.
Filmi zgjati gati një orë.
Ishte i veçantë nga përmbajtja narrative: informacionet për fenë në përgjithësi dhe sidomos për namazin që jepte, ishin kryesisht të reja për diskursin fetar të zakonshëm te ne.
Niseshin nga perspektiva dhe lidhje të ndryshme, herë përmbushnin dhe herë mjaftoheshin të hapnin horizonte të reja mendimi e meditimi.
Me risi dilte mënyra e dhënies së përmbajtjes narrative: herë jepej nga një norrator i jashtëm, sipas nevojës edhe ilustrohej, dhe herë vihej në gojën e aktorëve që me performancë të lartë artistike luanin në film.
Kjo mënyrë e të dhënit të përmbajtjes narrative nga dy plane duke i ndërlidhur efektshmërisht me njëri-tjetrin u tregua e suksesshme dhe funksionale, gjë për të cilën mund të dëshmojnë spektatorët që besoj të jenë ndjerë të përplotësuar nga efektet që ka sjellë njëri plan për të tjetrit.
Vërtet është shpërfilluar skema e zakonshme e të dhënit të përmbajtjes narrative nga vetëm një plan, por është bërë një risi që ia ka vlejtur për mjeshtërinë me të cilën është sjellë dhe që ka funksionuar.
Ambienti që shfaqej në film dhe ku luanin aktorët i përgjigjej natyrshëm dhe i funksiononte përmbajtjes.
Pas shfaqjes, u desh të niste të fliste prezentuesi që të ndërptiteshin duartrokitjet.
Për përshtypjet e mbresat folën Ali Iljazi, Milazim Krasniqi dhe këshilltari i myftiut Vedat Sahiti.
Në fund me fjalë përshëndetëse e falënderuese iu drejtua spektatorëve autori i filmit, Fatmir Muja, të cilit bashkë me bashkëpunëtorët e tij më të ngushtë, nga duart e myftiut dhe të Ferid Aganit, Bashkësia Islame e Kosovës u dha mirënjohje për punën e bërë .